Olats

Talo, apat na letrang kasing sakit ng mga pangakong napako

Mga titik na di mo alam kung paano lulunukin, buo ba o pagpipirasuhin

Sabi nga nila, di ikaw yong talo kapag maaga pa ay natigil na ang kahibangan

Pero kung di ako talo, bakit parang ang bigat ng sakit na nararamdaman?

Kung di ako talo bakit parang ang laki ng nawala

Kung di ako talo bakit parang ako lang ang nagluksa

Sa sobrang kampante ba kaya naging bulag at unti-unting naglaho

Naglaho ang pagmamahal at napapalitan ng galit ang puso

May mga maling kaya naman pag-usapan ng masinsinan

Pero bakit sa iba ka naghanap ng kanlungan

Siya na ba ang iyong pahinga habang ako naging daan mo papunta sa kanya

Siya na ba ang iyong dulo habang ako ang siyang tulay upang siya'y maabot mo

Minahal mo ba talaga ako o sadyang napilitan ka lang dahil sa mga kaya kong ibigay

Sa sobrang pagmamahal ko sayo di ko alam sarili kong mga dahon ay naging matamlay

Na sa panahong dinidiligan ko mga pangarap mo, nakalimutan kong alagaan sarili ko

Kailangan ko rin pala ng baterya para umusad tulad ng pag-usad mo

Diko namalayan na umuusad ka papalayo, habang ako ay nananatili pa rin sa likuran mo

Habang tanaw kita sa malayo, naisip kong ako naman siguro

Na gawin ko naman yung ikakasiya ko kasi ang akala ko maiintindihan mo

Di ko namalayang sa sobrang saya ko naging komportable akong katabi ka

Nasa tabi nga kita pero ang puso't isipan mo nasa iba

Sabi mo tapos na kayo pero bakit parang kasalanan ko, bakit parang kasalanan kong pumagitna na naman sya

Di lang sya pumagitna, siya pa mismo humahatak sa'yo palayo sa 'kin at lumaki lalo ang ating distansya

Di na kita abot, di ko sya abot. Pag-usad ko ay kay tumal, kasi ang hirap kapag sya ang naging batayan ng aking pagmamahal

Ano bang nagawa ko na nahigitan niya, ano bang ginawa nya na di ko nagawa

Ano bang meron sa kanya na wala ako, ano ba ang kaibahan ng luma sa bago

Ang dami kong tanong, dami kong iniisip

Pilitin mang maging masaya pero dala ko ang sakit hanggang sa panaginip

Natalo tayo sa biro ng tadhana, ay di pala 'tayo' - ako lang pala

Laging talo, puro simula di mahanap ang dulo

Olats na naman, kailan kaya ako mananalo.